Haur Hezkuntzako edo Lehen Hezkuntzako ikasgeletan erabil daiteke ohiko testuliburuen ordezko material digitalik?

Abstract

Ikasleei ABP metodologian aritu daitezen ondorengo galdera sortzaile planteatzen zaie: Haur Hezkuntzako edo Lehen Hezkuntzako ikasgeletan erabil daiteke ohiko testuliburuen ordezko material digitalik? Horretarako auzoko/herriko eskola “Eskola 2.0” proiektuan sartuta dagoela adierazten zaie eta bertoko Zuzendaritzak aurrera pausu berriak eman nahi dituela. Arrazoi hori dela medio pedagogo talde bati eskatu dio argitzeko nola bideratu proiektu hori. Eskatzen die baloratzeko proiektuaren bideragarritasuna, horretarako eragin ekonomikoa aztertuz eta izan beharko lituzkeen ezaugarri kultural eta pedagogikoak argituz. Ildo horri jarraitzeak eskatzen du, enkarguak ohiko testuliburuaren material alternatiboa proposatzea eta sortzea, bizi garen ezagutzaren gizartean euskarri digitalak gero eta erabiliagoak direlako eta ikasteko modu berria bultzatzen dutelako. Sortuko den produktuari begira, generoaren oreka zaintzea eskatuko da, derrigorrezko irakaskuntzan ezin baita erabili inolako ikasmaterialik sexu bereizketarik egiten duenik.

Talde guztietan proiektu bera planteatzen denez, eta emaitza dibergenteak sortzeko asmoz, proiektuan eragina duten osagaiak zaintzeko esango zaie, batez ere, honoko hauek kontuan har ditzaten: 1) ikastetxearen Proiektu didaktikoa; 2) baliabide berria erabiliko den ikasmaila eta irakasgaia; 3) ikastetxeak eginiko ibilbidea Eskola 2.0 edo antzekoetan; eta 4) software askearen eta sarearen erabilera.