BackEstiramenduei buruzko errebisio bibliografikoa
Abstract
Errebisio honen helburua estiramenduen inguruan dagoen literatura idatzia aztertu eta alderatzea da, izan ere azken urteetan egindako ikerketetan emaitza oso desberdinak lortu dira eta zaila da erantzun orokor eta absolutu bat ematea haien erabilerari buruz. Kontraesankortasun hori ardatz hartuz, errebisio honetarako azken urteetako ikerketa eta publikazioak alderatzen saiatuko naiz, ondorio zehatz batera iristea posible den aztertu nahian. Kirol bizitzan zehar, kirolen bat praktikatu badugu, entrenatzaile edota prestatzaile fisiko gehienek luzaketak gure errendimendua hobetzeko eta errekuperatzeko beharrezkoak direla esan digute ziurrenik behin baino gehiagotan, lesioaren prebentziorako eraginkorrak direla adieraziz. Aitzitik, ikerketa gehienek teoria horiek ezeztatzen dituzte, askotan mesede baino kalte gehiago eragiten dutela defendatzeaz gain. Zaila da, hala ere, formula bikain bat aurkitzea, ez baitago adostasuna metodo eraginkorrenak zein diren azaltzeko edota kirol bakoitzerako aplikazio egokienak zeintzuk diren adierazteko. Aurreko guztia dela eta, lan honetarako azken urteetan idatzitakoari buruzko errebisio bibliografiko bat egitea egokia iruditu zait, sor daitezkeen zalantzak argitu nahian eta erantzun bat ematea posible den zehazteko.