Etxalarko herria ezagutzeko aplikazioaren garapena, multimedia informazioa eta errealitate areagotua kontuan edukiz

Abstract

Proiektu honetan Etxalarko herrian dauden agenda, aukerak eta tokiak ezagutzeko eta bertan mugitu ahal izateko nonahiko aplikazio baten diseinua eta garapena egin da Android motako gailu mugikorrentzat. Aplikazioak multimedia informazioa erantsi du interfazean. Horrez gain, irisgarritasuna eta erabilgarritasuna bermatu ditu pertsona eta gailu bakoitzari moldaketa eginez eta eleanitza izanik. Irisgarritasuna eta erabilgarritasuna bermatzeko lehenik aplikazioaren analisi zehatz bat egin da eta bukatutakoan hainbat proba egin dira erabiltzaile ezberdinekin SUS galdetegiak ere erantzun dituztelarik.

Aplikazio honek Etxalarrera etortzen diren turistei erraztasunak ematea du helburu eta bertako turismoa sustatzea. Bere atal nagusiak herriari buruzko informazioa, non lo egin, jatetxeak, herrian bertan nahiz herritik kanpo zer bisitatu eta zerbitzuak dira. Hau guztia aurrera eramateko Android Studio garapen ingurunea erabili da nagusiki.

Aplikazioaren hedapena eta agenda eguneratuta edukitzeko, egileak Etxalarko udaletxeko langileekin hitz egin du (bereziki, Turismo arduradunarekin) proiektua garatzean. Udaletxetik konpromisoa lortu du turistei aplikazio honen berri emango zaiela, eta horrez gain agenda eguneratzen joango direla GAL honen egileak adierazitako tokian, aplikazioan egoki ikus dadin.