Medikazio akatsak murrizteko estrategien eraginkortasuna aztertzen

Abstract

Marko teorikoa eta justifikazioa: Medikazio akats bat eragitea erraza da gaur egun, ospitaleratuta dauden pazienteei farmako dosi ugari administratzen baitzaizkie egunero, erizainak direlarik prestaketa eta administrazio hauen arduradunak. Espainian, ospitaleratuta dauden pazienteen %37.4ak medikazio akats bat pairatzen du, ehuneko horren %34.8a prebenigarria izaten delarik. Erizainak farmako hauekin azken kontaktua duten osasun profesionalak izanda, oso garrantzitsua izango da medikazio akats hauek prebenitzeko estrategiak garatzea eta hauen eraginkortasuna zein den aztertzea.

Helburua: Helduen ospitalizazio unitateetan, prestaketa eta administrazio faseetan ematen diren medikazio akatsak murrizteko, erizainek erabili ditzaketen estrategien eraginkortasuna aztertu.

Metodologia: 2009.urtetik aurrera argitaratutako artikuluak aztertu ziren helburuari erantzuteko. PubMed, Cinahl, Cochrane eta Cuiden izan ziren artikuluak bilatzeko erabilitako datu baseak. Horrez gain, eskuzko bilaketa egin zen hainbat editorial eta aldizkari zientifikoetan, bai eta lortutako bibliografiatik ateratako hainbat artikulu hautatu ziren. Azkenean, 16 artikulu erabili zirelarik.

Emaitzak eta ondorioak: kontsultatutako bibliografian aurkitutako estrategiak 2 multzo nagusitan banatu ziren, alde batetik prestaketa fasean akatsak murrizteko baliogarriak ziren estrategiak eta bestetik administrazio fasekoak. Bi faseetan etenaldiak murrizteko estrategiak (txalekoaren erabilera adibidez) eta dispentsadore automatikoak ezartzea aurkitzen ziren prebentzio estrategia gisa. Administrazio fasean ere, aurreko bi estrategiez gain barra kodeen erabilera, profesionalei zuzendutako hezkuntza eta hainbat estrategien konbinaketak (barra kodea + dispentsadore automatikoak) aurkitzen ziren. Estrategia guztiek medikazio akatsak murritzeko ahalmena zutela azaleratu zuen bibliografiak, eraginkorrenak etenaldiak murrizteko estrategiak eta tekniken konbinaketak zirelarik. Barra kodearen teknologiari eta dispentsadore automatikoei buruzko iritzi kontraesankorrak aurkitu ziren.