Eraikuntzan energia-efizientzia hobetzeko tresnen ikerketa. Analisi dinamikoa Landagarre etxebizitzan

Abstract

Gradu amaierako lan honetan landa-turismoko eraikin baten azterketa energetiko dinamikoa egin da EnergyPlus programa eta honekin batera lanean aritzen diren beste zeinbait software erabiliz. Programa hauen nondik norakoak aztertu, hauen elkarlanaz baliatu eta inguruak eta egoerak ematen dituzten hobekuntzarako aukerak aztertuz, eraikinaren eraginkortasuna hobetzeko saiakera egin da. Horretarako, programa hauek eskaintzen duten analisi dinamikoa erabili da.

Proiektua aurrera atera ahal izateko, programa hauen funtzionamendua ezagutu eta landu behar izan da, ordurarte ezezagunak zirelako.

Programen bidez, eraikinaren modelo bat sortu da SketchUp-en neurri batzuk zehaztuz eta eraikinari forma emanez. Ondoren, SG Save eta OpenStudio erabiliz eraikinaren zehaztapena egin da; hau da, zenbait faktoreren datuak eta beharrezko informazio zehatza adierazi dira. Amaitzeko, simulazioen emaitzei erreparatuz, eskariaren arrazoi nagusiak aztertu dira eta honek hobekuntzarako ematen dituen aukeren inguruan hausnartu da. Hobekuntzarako zeuden aukera ezberdinak probatu dira eta analisi ekonomiko bat burutu da egokienak zein diren adieraziz.

Honetaz gain, CE3X programa ere erabili da eraikinaren ziurtagiri energetikoa lortzeko. Horrela, azterketa energetikoa burutzeko bi moduen arteko desberdintasunak ikusi ahal izan dira.

Lan honi bere zentzua emateko eta gaur egun horrelako proiektuek izan dezaketen pisuaz ohartzeko lehendabizi gaur egungo egoeraren inguruan hausnartu da, gizartean ingurumenarekin eta energiarekin dugun erlazioa azaldu da. Bertan, produkzioak eta kontsumoak, ingurugiro-kostua eta beharrezko ziren beste zenbait kontzeptu azaldu dira.