Parkinsona erritmoz bizi. Musikoterapiak Parkinson gaixotasunaren sintomen gainean duen eraginkortasunaren errebisio kritikoa

Abstract

Marko teorikoa eta justifikazioa: Parkinson gaixotasuna (PG) endekapenezko gaixotasuna da, hasiera batez beste 65 urtetan duena, prebalentzia %0,3-10 tartekoa izanik. Sintoma ohikoenak motoreak badira ere (bradizinesia, gorputz-jarreraren ezegonkortasuna, zurruntasuna eta dardarak), sintoma ez-motoreak ere agertu ohi dira gaixotasuna aurrera joan ahala, mendekotasuna nagusituz. Musikoterapiak (MT) osasunean hainbat onura ditu eta PG-ren sintoma motoreen arintzerako onurak izan ditzakela deskribatu da. Beraz, MT aktiboa zein pasiboa barneratu daitezke PG duten pertsonen zainketetan. Helburua: Musikoterapiak Parkinson gaixotasunaren bradizinesia, zurruntasuna, dardarak eta gorputz-jarreraren ezegonkortasuna sintomen arintzean duen eragina aztertzea. Metodologia: 2010 eta 2020 urte bitartean argitaratutako ikerketak erabili dira. Hainbat datubaseetan egin da bilaketa, hala nola, Medline, Cuiden, Cinhal, Cohrane, PsycInfo eta PubMed. Horrez gain, eskuzko bilaketa ere egin da hainbat aldizkari elektroniko espezializatuetan. Bilaketa gaztelaniaz eta ingelesez idatzitako artikuluetara mugatu egin da eta azkenik, 15 artikulu aztertu dira. Diseinuari dagokionez, 12 entsegu klinikoak izan dira, 2 ikerketa kualitatibo eta diseinu mistoko 1. Emaitzak: 15 artikuluetatik, zortzi artikuluk musikoterapiaren eraginkortasuna entrenamenduzko interbentzioarekin batera aztertu zuten, hiruk kantu-interbentzioen eraginkortasuna, beste hiruk dantza-interbentzioarena eta azkeneko batek musikoterapiaren eta tratamendu farmakologikoaren arteko lotura aztertu zuen. PG-ren sintoma motoreen arintzerako musikoterapiak eraginkortasuna erakutsi du eta teknika erabilgarria dela esan daiteke. Ondorioak: Orokorrean, errebisio honen bidez atera izan den ondorio nagusia musikoterapia ariketa fisikoekin batera eginez gero PG-ren sintoma motoreen arintzea lortzen dela, batez ere, gaixotasunaren estadio goiztiarretan. Gainera, ikerketa gehienetan aztertu den moduan, musikoterapia tratamendu ez-farmakologiko osagarri gisa erabili daiteke, ohiko medikazio dopaminergikoaren batera administratuz.