Atzerritarrentzako errusieraren irakaskuntza: mugimenduzko aditzak aginteran.

Abstract

Gradu Amaierako Lan honetan, errusiera atzerriko hizkuntza gisa irakasten ari den irakaslea banintz bezala jokatuko dut eta errusieraren gramatikako atal zehatz bat landuko dut: mugimenduzko aditzak aginteran. Lehenik eta behin, lan honen bitartez lortu nahi ditudan helburuak azalduko ditut, baita helburu horiek lortzeko erabiliko dudan metodologia ere. Ondoren, lana bi atal nagusitan banatuko dut: azalpen teorikoa eta analisi praktikoa. Lehenengo atalean, ahalik eta sakonen deskribatuko dut gramatika arlo hori: azalpena mugimenduzko aditzekin hasiko da, jarraian aginteraren osaketari helduko dio eta mugimenduzko aditzen aginterarekin amaituko da. Behin azalpen teorikoa bukatuta, bigarren atala hasiko da, eta bertan, errusiera irakasteko dagoen materiala aztertzeari ekingo diot. Gaur egun eskura ditugun eskuliburu orokorrak, eskuliburu espezifikoak eta gramatika praktikoak ikertuko ditut. Liburu bakoitzak aztergai dugun gaia nola lantzen duen ikusiko dut: azalpen teorikoak ematen duten ala ez, adibideak eskaintzen diren ala ez, ariketak dauden ala ez etb. Azkenik, bildutako informazio guztia baloratuko dut, eta ondorioztatuko dut ea aztertutako liburuak gai hau irakasteko baliagarriak diren ala ez.