Euskaratik alemanera zeharka itzuli diren literatur lanen analisia

Abstract

Gradu Amaierako Lan honetan euskaratik alemanera zeharka itzulitako literatura aztertuko dugu, euskal itzulpengintzaren ikerketa-esparruaren ezagutzan sakontzeko asmoz. Zeharkako itzulpenaren kasu zehatza aukeratu dugu, gai interesgarria iruditzen zaigulako eta, lanaren atal teorikoan azalduko dugun bezala, arlo horrek ez duelako orain arte arreta handirik jaso itzulpen-ikasketen baitan.

Gure helburua lortzeko, alemanera zeharka itzulitako euskarazko literatur lanak biltzen dituen katalogo edo corpusa eratu dugu (ik. 1. Eranskina) eta katalogo horren azterketa izango da gure lanaren muina.

Zeharkako itzulpena hizkuntza jakin batzuetako literatur sistemek literatura esportatzeko eta inportatzeko erabiltzen duten tresna izan ohi da. Fenomeno hau hizkuntza gutxitu eta gutxiagotuen baitan gauzatzen da batez ere, lanean azalduko dugun hainbat ezaugarrirengatik. Lehenik eta behin, zeharkako itzulpena zer den, zergatik sortzen den eta bere baitan zer dinamika gertatzen diren ulertzea ezinbestekoa da, euskal literatur-polisisteman zeharkako itzulpenak duen pisuan gehiago sakondu aurretik; horri esker, gure ikerketa-subjektuari buruzko ikuspegi zabalagoa izango dugu. Era berean, zeharkako itzulpena aztertzea ezinbestekoa da itzulpen-ikasketen esparruan, agerian uzten baititu bestela inola ere hauteman ezingo genituzkeen literatur sistemen ezaugarriak.