dc.description.abstract | Hizkuntzen eta nazioen arteko lotura kultural, sozial zein politikoak nabarmenak dira
kasu askotan; nekez banandu ditzakegu hizkuntza gehienak nazio kontzeptutik. Eremu
urriko hizkuntzen kasuan harreman horiek bereziki konplexuak dira, hizkuntza txiki eta
nagusien arteko lehiak, funtsean, lurralde txiki eta nagusien arteko lehia ere ekartzen
duelako. Hala, politikak esku hartzen du hizkuntzaren esparruan, eta horrek eztabaida
delikatua dakar sarritan. Lan honetan, kornubiera hizkuntzaren bilakaera aztertu dut.
Kornubieraren kasua bereziki bitxia da bere historian zehar bizi, hil, eta berpiztu egin
delako. Horregatik, batez ere XVIII. mendeko heriotza XX. mendeko berpizkundea eta
gaur egungo egoera aztertu ditut. Horretarako, heriotzan zein berpizkundean eragina izan
duten hainbat aspektu hartu ditut oinarri, bai eta hizkuntzaren gorabehera nabarmenak
ere. Hain zuzen ere, gorabehera horiek, askotan, hizkuntzaz gaindiko gertakariek zehaztu
dituzte eta beraz, hizkuntza bera bakarrik ez, hizkuntzaren testuingurua ere kontuan hartu
dut. Testuinguru horretatik kornubiar nortasunaren oinarriak eta nazionalismoarekiko
jarrera orokorra bildu ditut, eta hizkuntzaren eta nazionalismoaren arteko lotura
orokorrago bat jaso ahal izateko, konparaketa egin dut beste hizkuntza eta egoera
soziolinguistiko batzuekin, hala nola hebreerarekin. Bi hizkuntzek herri-hizkuntza gisa
beren lekua berreskuratu nahi izan duten arren, berpizkundeak oso modu ezberdinean
garatu dira kontzeptu gako baten ondorioz: kornubiera nazionalismo eta eremu politikotik
guztiz aldendu den bitartean, hebreera proiektu politiko baten baitan berpiztu zen. Ildo
horretatik, nazionalismoen aspektu politikoa, hizkuntzaren politizazioa eta politizazio
horrek hizkuntzaren berpizkundean duen eragina ere aztertu ditut. Bukatzeko,
kornubieraren historiak, hebreerarekiko alderaketak eta eremu urriko hizkuntzen
azterketak hainbat ondoriotara ekarri naute, eta nazio eta hizkuntzen harremana nolakoa
den ondorioztatu ahal izan dut.
Hizkuntza: euskara | es_ES |