Greba eskubidea espainiar estatuko ordenamendu juridikoan
Abstract
[EU] Greba eskubidearen garapen sakona XIX. mendetik aurrera kokatzen den arren, aurretik historian zehar ere greba mugimenduak egon izan dira, langileek euren nagusien aurrean euren baldintzak aldezteko, edo berri batzuk aldarrikatzeko tresna gisa. Europako eta espainiar estatuko ordenamendu juridikoan grebak hainbat garai izan ditu: Erabateko debekuaren aroa, onarpen aroa eta legezkotzearen aroa.
Gaur egungo espainiar estatuko ordenamendu juridikoan, greba eskubidea 1978ko Konstituzioan 28.2 artikuluan zehaztuta dago, eta oinarrizko eskubide izaera du. Bere izaerarengatik eta kokalekuagatik, babes helegitea onartzen da 53. artikuluari jarraiki, era ezeztaezinean eskubidearen egikaritza bermatzeko.
Greba eskubideak titular zehatz batzuk ditu, besteren konturako langileak direnak. Baita ere, hainbat greba mota bereiz daitezke, eta mota bakoitzak bere legezko onarpen edota legez kontrako izaera du. Izan ere, greba mota guztiak ez dira legezkoak, hainbat muga eta betekizun bete behar direlako.
Horretarako, prozedura zehatz bat jarraitu behar da. Izaera orokorrez prozedura bat dago, baina izaera berezietan, oinarrizko zerbitzuen kasuan, gutxieneko zerbitzuak daude, eta prozedura bestelakoa da. Berebat, grebak ondorio zehatz batzuk ditu gizarteko subjektu ezberdinetan. Amaitzeko, gogoeta egiten da greba eskubideak lege organikorik ez duela kontuan hartuz, nahiz eta bere izaeragatik onartzen den, eta horrek mesede egingo liokeela segurtasun juridikoa izate aldera.