Egoitza zentroetan bizi diren adineko pertsonen libragarrien preskripzio farmakologikoa eta honen ondoriozko kostua

Abstract

Helburua: Idorreria, bost heldutik batek pairatzen duen sindrome geriatrikoa da eta egoitza zentroetan bizi diren % 50-75ek pairatzen dute. Egoitza zentroetan bizi diren adineko pertsonen libragarrien preskripzioaren prebalentzia eta hauen erabilera bultzatzen duten faktoreak ezagutzea izan da helburu nagusia. Bestalde, finantziatu gabeko medikamentuak direla jakinik, egoiliarrei dakarzkien ondorio ekonomikoak ebaluatzea izan da beste helburua. Garapena: Matia Fundazioko egoitza zentroetako unitate gerontologiko eta psikogeriatrikoetan behaketazko ikerketa multizentriko transbertsala egin zen. 2022ko martxoaren 21ean, egoiliarren datu soziodemografikoak zein klinikoak bildu, preskribaturiko libragarrien erabilera ebaluatu eta egoiliar bakoitzari hilero zekarkion kostu ekonomikoa estimatu zen. Munduko Osasun Erakundearen ATC sailkapenaren arabera egoiliarrek preskribatuta zituzten medikamentuak aztertu ziren. Libragarrien preskripzioaren prebalentzia % 56,14koa izan zen eta hauek hartzen zituztenen artean osmotikoak (A06AD) izan ziren erabilienak % 95,73ko maiztasunarekin. Emakumeetan eta egoera kognitibo (GDS: Narriadura Orokorraren Eskala ≥6) zein funtzional (Barthel Indizea ≤35) okerragoan zeuden pertsonetan libragarriak hartu beharra arruntagoa dela ikusi zen. Idorreria eragin dezaketen medikamentuen preskripzioa ikertu zen eta antipsikotikoak (N05A) eta beste antidepresiboak (N06AX) libragarri gehiago erabiltzearekin erlazionatu ziren. Norbanako baten preskripzioan idorreria eragin dezaketen medikamentu jakin batzuk metatzeak ere (≥2 medikamentu) erlazioa duela ikusi zen. Azkenik, paziente bakoitzaren libragarrien erabilerari loturiko hilabeteko batezbesteko kostua 12,38€-koa zela kalkulatu zen, hilean gutxieneko errenta jasotzen duten pertsonen norberaren aukerako gastuetarako duten diruaren % 13,54a. Ondorioak: Libragarriak egoitza zentroetan bizi diren pertsonen artean maiztasun handiarekin preskribatzen diren farmakoak dira eta hainbat ezaugarri soziodemografiko zein farmako erabilerekin erlazionatu dira. Horrenbestez, zenbait pertsonen egoera ekonomikoa zaurgarria dela ikusita, libragarriak medikamentu finantziatuen barne sartzea funtsezko neurria dela erakutsi da.