Elikadura egokiaren garrantzia erretinako distrofia hereditarioetan

Abstract

Lan bibliografiko honetan elikadurak erretinako distrofia hereditarioetan duen eragina aztertzen da Begisare asoziazioaren laguntzarekin. Lanean zehar distrofietan eragin onuragarriak zein kaltegarriak dituzten elikagaiak aztertzen dira, eta onuragarriak nola sukaldatu eta kontserbatu azaltzen da. Bestetik, hartu beharreko elikagaien errazioen tamainak eta ikusmen gutxitua zein itsutasuna duten pertsonen zailtasunak adierazten dira. Erretinako distrofia hereditarioak trastorno desberdinen gaixotasun kroniko arraroa da, jatorri genetikoa eta intzidentzia baxua duena. Azken urteetan gaixotasun honetan elikadurak duen garrantziaz jabetzen hasia da gizartea. Konposatu onuragarrien artean A probitaminaren aktibitatea duten karotenoideak, luteina eta zeaxantina karotenoideak, E eta C bitaminak, omega-3a, zenbait mineral eta bestelako konposatuak aurkitzen dira. Hala ere, distrofia motaren arabera edo kontsumo dosiaren arabera konposatu batzuek kalteak eragin ditzakete. Gainera, ikusi da elikagaiak sukaldatzeko eta kontserbatzeko moduak eragin handia duela nutrienteen galeran, beraz, berebiziko garrantzia izango du metodo egokien bitartez burutzea hauek. Elikagaien errazioaren tamainari dagokionez, gomendio dietetikoa adierazten da, suplementazioaren dosi bateratua ez dagoelako, eta pairatzen den distrofia motaren eta pertsonaren araberakoa izan behar duelako. Azkenik, ikusmen gutxitua duten pertsonek elikatzeko orduan aurkitzen dituzten zailtasunak azaltzen dira, erosketa egitetik elikatzeko ekintza arteko prozesu osoan zehar zailtasunak aurkitzen baitituzte. Honek, desinformazioarekin batera, elikadura desegokia eramatea eragiten du. Pertsona hauen bizitza errazten eta gizartea kontzientziatzeko bidean Begisarek paper garrantzitsua du, hainbat aktibitate burutuz. Ikerketei dagokionean, ikerketa gutxi eta adostasun gutxikoak dira gehienak. Beraz, emaitz fidagarriak eta pisuzko ondorioak ateratzeko etorkizunean gehiago sakondu beharreko gaia da. Gainera, garrantzitsua izango da distrofia mota bakoitza zehazki ikertzea eta ikerketa homogeneoagoak egitea.