Narratologia feminista eta Ernauxen eragina Irati Elorrietaren Neguko argiak eleberrian

Abstract

[EUS] Lan honen helburua Irati Elorrietaren Neguko argiak (2018) eleberriaren azterketa narratologiko feminista egitea eta, bereziki, Annie Ernauxen Les Annèes (2008) nobelarekiko testuartekotasun eragina aztertzea da. Horretarako, lehenengo atalean azterketa narratologikoan beharrezkoak izango diren tresnak zehaztu eta horien inguruan aritzeko marko teoriko-metodologikoa zehaztuko da, beti ere narratologia feministaren ildotik. Hain zuzen, Lanserren (1992; 1996) narratologia feministari jarriki egituratuko da marko teorikoa eta, hori horrela, lehendabizi ahots narratiboari erreparatuko diogu egile ahotsa, ahots pertsonala eta ahots komunitarioa bereiziz. Bestetik, narratologia feministak espazioa eta testuartekotasun kontzeptuen inguruan eginiko xehetasunak ere jorratuko dira.

Bigarren atalean, Irati Elorrietaren literaturaren inguruko zertzelada nagusiak aurkeztuko dira lehenik, Burbuilak (2008) eta Neguko argiak (2018) liburuetan oinarrituz, bereziki; kontakizun denak Berlinen girotzen diren neurrian. Gradu Amaierako Lan honen hirugarren atalean eleberriaren azterketa zehatzari ekingo zaio. Analisi honetan, ikuspegi feministatik landuko dira eleberriko ahots narratiboa, espazioa eta testuartekotasuna. Ahots narratiboari dagokionez, Lanserren ahots komunitarioak bereganatzen duen garrantziari erreparatuko zaio; espazioa lantzerakoan, aldiz, literaturako etxearen ulerkera feministari; eta azkenik, testuartekotasunean Annie Ernauxen eragina nabarmenduko da. Amaieran, azterketatik eratorririko ondorio nagusiak aurkeztuko dira, eta bibliografia zerrenda erantsiko da APA 7 arauei jarraituz.