Negozioen Kudeaketarentzako Zuzenbiderako Sarrera

Abstract

Ikasmaterial hau Euskal Herriko Unibertsitateko Ekonomia eta Enpresa Fakultateko Elkano Ataleko ikasle euskaldunengan pentsatuz egin da. Hain zuzen ere, Negozioen Kudeaketako Graduko lehen mailako Zuzenbiderako Sarrera eta Ondasun Zuzenbide Pribatua irakasgaiarentzako euskarazko ikasmaterial gisa garatu da, eta irakasgaian landu behar diren eduki teorikoen oinarriak jasotzen ditu. Hala ere, unibertsitate-gradu askotako irakasgaietan beharrezkoa da Zuzenbidearen ikuspegi orokor bat, bereziki gizarte-zientzietako graduetan. Horietan, mesedegarria izan daiteke ondasun-zuzenbidearen gaineko azterketa ere. Kasu horietan guztietan ikasmaterial hau Zuzenbiderako sarrera gisa erabil daiteke, eta, nahi izanez gero, garatu nahi diren gaiak eskuliburu erabilgarrienekin osatu daitezke. Hori da, hain zuzen ere, testu honen helburua: Zuzenbidearen arlo orokorren hasierako azterketa eskaintzea, baita Ondasun Zuzenbidearena ere. Lehenengo esparruari begira, lehenik eta behin, Zuzenbidearen eta Zuzenbide Zibilaren ikuspegi orokorra aurkezten da. Bigarrenik, Zuzenbidearen testuingurua eta iturburuak aztertzen dira. Ondoren, Zuzenbidearen subjektuak eta eskubide subjektiboak. Bigarren esparrua, ekonomia eta enpresa arloko ikasleentzat bereziki, etorkizunean MerkataritzaZuzenbidea ikasteko oinarria da. Horrela, jasotzen den azterketa ondare eta eskubide errealekin hasten da, betebeharrekin eta negozio juridikoarekin jarraituz, eta, azkenik, kontratuaren arauketa orokorra aztertzen da, baita kontratu mota ezberdinena ere. Ikasmateriala egiteko funtsezko oinarri juridiko gisa Konstituzioa eta Kode Zibila hartu dira, azken horrek 2023. urtera arte izan dituen eguneratzeak barne.