Europar Batasuna. Europaren integrazio prozesuaren ikuspegi orokorra

Abstract

Ikasmaterial hau Bizkaiko Esperientzia Gelen ikasle euskaldunengan pentsatuz prestatu da. Hain zuzen ere, Giza Zientzien Unibertsitate Tituluaren Historia de la integración europea. La Unión Europea irakasgaiarentzako euskarazko ikasmaterial gisa garatu da. Hala ere, unibertsitate-gradu askotako irakasgaietan Europar Batasuna aztertzen da: sakonki Zuzenbidean; ikuspuntu ekonomiko batetik enpresa eta ekonomia arloko graduetan; ikuspegi orokorra lortu nahian gizarte zientzietako beste zenbait gradutan. Kontutan izanik euskarazko testurik ia ez dagoela, ikasmaterial hau aipatutako azken gradu horietan ikasmaterial orokor gisa erabil daiteke. Bestalde, lehenengo bi kasuetan ere erabilgarria izan daiteke, gaira hurbiltzeko helburuarekin oinarrizko ikuspegia lortzeko tresna gisa, behintzat. Ikasmaterial honen helburua Europaren integrazio prozesuaren eta eguneko Europar Batasunaren ikuspegi orokorra eskaintzea da. Alde batetik, lehenengo hiru atalek deskribapen kronologikoa jasotzen dute, Europako lurraldeen batasunaren ideiari buruzko laburpen batetik hasita, eta 1950eko hamarkadan martxan jarritako Europaren integrazio prozesuaren bilakaera aztertuz bigarren eta hirugarren ataletan, betiere nazioarteko testuingurua kontutan hartuta. Bestalde, hurrengo hiru gaietan, Europar Batasuna bera aztertzen da: helburuak, antolaketa orokorra eta zuzenbidea; arlo ekonomikoa (merkatu batua eta ekonomia eta diru batasuna); eta Europako hiritartasuna. Azkenik, Europar Batasunarekin lotura estua duten beste nazioarteko erakunde batzuk aurkezten dira. Bibliografian, aipatutako edukia prestatzeko erabili diren iturriak adierazten dira: gaiaren inguruko gaztelaniazko eskuliburuak eta euskaraz aurkitu daitezkeen dokumentuak. Irudien eta taulen kasuan, bakoitzaren azpian adierazten da iturria.