Atzerritarrei buruzko legeak pertsona migratzaileen gizarteratzean duen eragina

Abstract

Gradu amaierako lan honek 4/2000 Atzerritarrei buruzko Legeak etorkinen gizarteratze-prozesuan dituen ondorioak aztertzea du xede. Immigrazioa historia osoan zehar errealitate bat izan bada ere, honen nolakotasuna aldatuz joan da urtez urte. Migrazio-fluxu horiek erregularizatzeko asmoz neurriak hartuz joan dira, eta besteak beste, Espainian, Atzerritarrei buruzko Legea sortu zen, immigrazio gorakadaren ondorioz hau erregulatu nahian. Lege honek etorkinen eskubide eta askatasunak zehazten dituen heinean, ezinbesteko eragina du haien bizitzan zein haien gizarteratze prozesuan. Horren aurrean, pertsona migratzaileen gizarteratze egoki baterako hezkuntza antiarrazistari ematen ari zaion pisuaz gain, instituzio eta legeen aldetik ere zein tratu ematen zaien eta zein ikuspuntutik eginda dauden ikusi eta aztertzea beharrezkoa da. Lan honetan, beraz, alderdi legalari helduko zaio, 4/2000 Lege Organikoari hain zuzen, berez helburu duen gizarteratzeaz haratago, Legean zehazten diren eskubide zein askatasunak eskuratzeko baldintzak aztertu eta Legeak benetan etorkinen integrazioa ahalbidetzen duen ikertzeko asmoz. Lehenik, beraz, Legearen azterketa sakona egin da marko teorikoan. Ondoren, metodologia kualitatiboaren hautaketa egin da etorkinei beraiei ahotsa emateko, Atzerritarrei buruzko Legearen ondorioak jasotzen dituzten zuzeneko pertsonak baitira, eta aldi berean, beren gizarteratze-.prozesuari buruzko analisian ezinbestekoa baita euren ikuspuntu eta hitzak entzutea. Legearen azterketa teoriko sakona egiteak eta bere aplikazioak etorkinengan duen eragina aztertzeak, lan honen hipotesiak kontrastatzeko bidea eman du, hots, atzerritarren legeak, oinarrian duen gizarteratze helburua urratuz, lan-kontraturik gabe iristen diren etorkinen gizarteratzea oztopatzen duela.