Adinekoentzako bizitoki-baliabideak aztergai: ohiko etxebizitza komunitario eta cohousing-a bezalako eredu berritzaileagoen artean. Donostiako Matia Fundazioko Lamourous egoitzako kasua

Abstract

Arrazoi objektiboetan erdiratuz, esan daiteke zahartzaroaren inguruan gehiago hausnartzeko beharra dagoela prozesu honetan benetako bizi-kalitatea lortu nahiez gero. Izan ere, geroz eta gehiago bizi garenez, are eta gehiago pentsatu beharko genuke adinekoei zuzendutako baliabideen inguruan. Beraz, azken urteetako aurrerapen medikuak direla eta gizateria gero eta luzeago bizi garen une hauetan, berebiziko garrantzia du hirugarren (eta laugarren) adinera iristen diren pertsonen ongizatea ahal bezain beste bermatzea horien bizitzen amaierara arte. Hori dela eta, lan honek bizitzako azken etapa hori igarotzeko existitzen diren baliabide erresidentzial desberdinen azterketa du helburu. Baliabide erresidentzial horiek askotarikoak izan daitezke, baina funtsean etxebizitza komunitarioak (ohiko adineko pertsonen erresidentziak), apartamentu babestuak eta Cohousing erakoak (azken bi hauek eredu berritzaileagoak) izango ditu oinarri. Eta lanak abiapuntu duen hipotesia izango litzateke eredu berritzaile horiek pertsonan erdiratutako eredua bermatzeko gaitasun gehiago daukatela, pertsonen ongizatea gehiago garatuz, beraz, eta horrenbestez ohiko baliabide tradizionaletatik berriagoetara salto bat ematea beharrezkoa edo gutxienez interesgarria izan daitekeela. Lanaren hipotesi eta helburuak ondo zehaztu ostean, marko teorikoa garatu da hirugarren adinaren inguruko kontzeptu nagusiak landuz, esate baterako edadismoaren edota bizitza kalitatearen esanahiak definitu dira. Honen ostean, metodologia zehaztu da, hots, kualitatiboa izan dena eta erabilitako teknika nagusia elkarrizketa sakonarena. Nahiz eta egunerokoan murgilduta nagoen errealitate bat izanik Ekintza Parte-Hartzailearen (IEPH) markoan kokatu ahalko litzatekeen, horrek behaketarako, entzuteko eta partekatzeko ematen duen aukera paregabea kontutan izanik. Ondoren, elkarrizketen bidez jasotako informazioaren analisi sakona burutu da, betiere hipotesi eta helburuak kontuan izanik horretarako eskuratu dugun informazioa era antolatu batean sailkatu eta modu ordenatuan adieraziz. Azkenik, ondorioen atalean eztabaida bat burutu da lan honek planteatutako hipotesi eta helburuen inguruko aspektuak iruzkindu zein hausnarketa nagusiak biltzeko helburuarekin.