2024 emozioen lanketa ikaskuntza inguruneetan

Abstract

[EUS] Lan honetan hezkuntza emozionalak Gorputz Hezkuntzan izan dezakeen eraginari buruz hitz egingo da, ingurune desberdinetan ikasleek izaten duten jarrera eta emozioen kudeaketa behatuz. Horretarako, lehenik hezkuntza emozionala zer den azalduko da eta honen barruan aurkitzen diren kontzeptuez mintzatuko da, hala nola konpetentzia emozionalez eta hauek lantzeko erabil daitezkeen metodologiez. Bestalde, Gorputz Hezkuntza azpimarratuko da, hau zertan datzan eta honen erronkak aipatuz. Horrela, ikasgaiak dauzkan helburu nagusiak eta azkeneko urteetan jasan dituen aldaketak azalduko dira, irakurleak ikasgai honi buruz daukan ideia sendotzeko eta gaur egungo Heziketa Fisikoaren kontzeptua ulertzeko asmoz. Behin bi kontzeptu horiek, hau da, hezkuntza emozionala eta Gorputz Hezkuntza, argi edukita, bien arteko lotura eginen da, biak bata bestearen bitartez lantzearen garrantzia azalduz eta bien artean dagoen lotura estua nabarmenduz. Horren ostean, terminologia emozionala azalduko da, lanean zehar agertzen joanen diren kontzeptu batzuk ulertzeko eta gaia ulerkorrago bilakatzeko asmoz. Behin marko teorikoa azalduta, atal praktikoari hasiera emango zaio. Lan hau Gasteizko Salburua eskola publikoko ikasle talde batean eraman da aurrera, non ikaskuntza inguruneetan oinarritutako ikas-egoera bat egin den ikasleak jolas librean eta ingurune espezifikoetan bizitzen dituzten gorabeherak aztertzeko. Helburu nagusia ikasleek beraien emozioak nola identifikatzen, islatzen eta besteenak errespetatzen dituzten ikustea da ikaskuntza inguruneetan oinarritutako ikas-egoera baten diseinuaren egokitasunarekin. Horretarako emozioei buruzko hainbat galdetegi banandu zaizkie ikasleei eta saioetan irakasleak geroago azalduko den “pedagogia ikusezinaren” bitartez behaketa aktiboa erabili du ikasleen harremanak ikusi eta hauei buruzko hausnarketa landua egiteko.