Bullying LGTB-fobikoa Euskal Herriko nerabeetan: prebalentzia, aldagai psikologikoekiko lotura eta eragina osasun mentalean.

Abstract

Azken hamarkadan, bullyingak interes zientifiko handia piztu du ikerlari anitzen artean. Hala ere, bullying LGTB-fobikoa aztertzen duten ikerketen artean hutsegite handia nabaritu da. Ikerketa honek bi helburu proposatzen ditu (1) Bullying LGTB-fobikoaren prebalentzia eta nerabeek aniztasun sexualaren aurrean dituzten jokaerak aztertu; eta (2) Bullying/Cyberbullying orokorra eta LGTB-fobikoa sufritu eta burutu duten pertsona ez-heterosexualen eta heterosexualen artean, osasun mentala eta nortasun ezaugarriak alderatu. Euskal Herriko 19 ikastetxe publiko eta pribatu aukeratu ziren zorizko laginketaren bidez, 13-17 urte bitarteko 1.748 ikasleek osatzen duten lagin adierazgarria lortuz. Partaideek 11 ebaluazio tresnez osatutako galdetegia bete zuten. Orokorrean, emaitzek honako hau adierazi zuten (1) Bullying: % 41,6 biktima, % 28,4 erasotzaile; Cyberbullying: % 36,3 biktima, % 18,1 erasotzaile; Bullying LGTB-fobiko: % 60 biktima, % 6,6 erasotzaile, % 73,4 behatzaile; (2) Orientazio/identitate sexual ez-normatiboa duten pertsonek bullying/cyberbullying orokorra nahiz LGTB-fobiko gehiago sufritzen dute; (3) Mutilek jarrera LGTBfobiko gehiago burutzen dituzte eta neskek aniztasun sexualaren aurrean jarrera positiboagoak dituzte; (4) Biktima eta erasotzaile ez-heterosexualek sintoma psikopatologikoetan eta enpatian puntuazio altuagoak adierazten dituzte eta baxuagoak norberaren feminitate-irudian, adimen emozional intrapertsonalean eta zoriontasunean. Emaitza hauek kontuan hartuz, azpimarratu beharra dago esku-hartze eta prebentzio programak sortu behar direla, desberdinarekiko tolerantzia eta errespetua adierazten duen gizartea lortzearen helburuarekin.