Heziketa fisikoko irakasle talde baten formakuntza emozionala

Abstract

Dokumentu honetan aurkezten den lana, Gasteizko hezkuntza eta Kirol Fakultateko Irakasle eskolan graduatzeko burutu dudan gradu amaierako lana da. “Heziketa fisikoko irakasle talde baten formakuntza emozionala” izenburu pean, lan honetan emozioak, heziketa fisikoa eta irakasleen formakuntza kontzeptu eta ideiekin dantzatzen da, eta helburu nagusitzat hartzen da lehen hezkuntzako heziketa fisikoko irakasle talde batek duen emozioei buruzko formakuntza zein den ikertzea. Irakasle zena txikitatik izateagatik, hezkuntza inguruan buru belarri ibilitakoa naiz, are gehiago nire irakasle izateko grina nire zaletasun nagusiarekin lotzeko aukera izatean, jarduera fisikoa eta kirola. Hau honela, lehen hezkuntzako irakasle izateko gradua bukatzear nagoela, aurrez egindako Jarduera fisikoaren eta kirolaren zientzien graduak eta irakasle izateko masterrak asko aberastu dute nire ibilbide akademikoa. Egindako praktikek, eta izandako lan esperientziek heziketaz dudan ikuspegi eta jakintzak eraikitzen lagundu didate, hezkuntzaren altxorrak ezagutzen, baina baita hezkuntza sistemaren gabezia eta hutsuneak ikusten. Nire azken esperientziek, emozioen munduan barrena kuxkuxeatzera eraman naute, bai arlo profesionalean, bai arlo pertsonalean ere. Emozioek, gure egunerokotasunean duten presentzia, imajinaezina da. Askotan konturatzen ez garen arren, gure jokabide eta harremanak emozioengatik baldintzatuta daude, pertsona bezala hazteko eta garatzeko bidean sentitzen dugun hori ongi kudeatzea ez baita erraza. Bizitzaren alor guztietan duen garrantzia jakina bada, zer esanik ez ikastetxeetan, gure hezkuntza sisteman, ikasleen garapen intelektualaz gain, garapen pertsonalak behar duen garrantzia ematen badiogu behintzat. Ikasle bezala, uste dut, heziketa ibilbidean emozioak kudeatzen jakitea, bizitzaren alor guztietan arrakasta lortzeko bidea dela. Emozioak kudeatzeko gai ez den ikasleak zailtasunak izango dituelako bai errendimendu akademikoan, baina baita bere bizitza pertsonalaren beste alderdietan ere. Hau honela, irakasleak duen paperaz hausnartzeko parada hartu dut lan hau egitean. Irakaslea ikasleen bidelagun izanik, emozioen ezagutza eta kudeaketa estrategiak garatzeko baliabideak eskaini behar dizkie ikasleei. Baina nola lortu gure ikasleak osasun emozionala izatea, ez badugu honen inguruko formaziorik jasotzen? Nire ibilbide akademikoan, gai honen inguruko kontzeptuak eta ideiak landu izan ditudan arren, iruditzen zait ez zaiola behar bestekoa garrantzirik ematen. Eta nola lagundu eta bideratuko ditugu gure ikasleak emozioen munduan, guk ez badugu behar besteko formaziorik? Guzti hau, heziketa fisikoaren alorrera eramanda, are interesgarriagoa egiten zait gaia. Izan ere, heziketa fisikoak eskaintzen dituen egoera eta baliabideekin, guztiz beharrezkoa ikusten dut emozioetan oinarritutako irakas-ikaskuntza prozesua aurrera eramatea. Hau honela, lan honetan alde batetik gaiaren inguruko kontzeptu eta ideien azalpen bat aurkezten da, emozioak heziketa fisikoan duten lekua azalduz, eta egoera honetan irakasleen paperaz, eta hauen formakuntza beharraz hitz eginez. Bigarren atalean, irakasle talde bati eginiko inkesta baten bitartez, heziketa fisikoko irakasleen emozioen inguruko formakuntzaren inguruko informazioa jasotzen da, eta datu hauek aztertuz hainbat ondoriotara iritsi.