Arratia bailarako udalerrien autohornikuntza energetikorako analisia

Abstract

Aldaketa klimatiko eta herrialdeen arteko gatazka geopolitikoak medio, nabarmen igo da energia kontsumo eta produkzio ohiturak aldatzeko beharra. Horregatik, azken urteotan, matrize energetiko iraunkorrago eta eraginkor batera eramango gaituen trantsizioa lehentasun bihurtu da mundu mailan. Testuinguru honetan, energia-fosilen agorpenari eta aldaketa klimatikoari erantzun bat emateko asmotan, ugari izan dira azken urteotan Europar Batasunean zein mundu mailan sinatu diren itun eta akordioak, energia-iturri berriztagarriak zein autokontsumoa bultzatzeko asmoz. Hala ere, aukeratu den bide horretan, begirada guztiak eskala handiko energia berriztagarrien proiektuetan daude jarrita, tokiko ezaugarri eta beharrak bigarren plano batean utziz. Esan bezala, tradizionalki energia-eredua sorkuntza zentralizatuan oinarritu izan da non energia, kontsumo-puntutik kilometro askotara ekoizten den. Horretarako, toki bakarrean kontzentratutako instalazio erraldoien beharra garatzen da, ingurumen-inpaktua eta transmisio-galerak handituz. Gainera, kontsumitzaileak subjektu pasiboaren papera hartzen du bere gain, sorkuntza horrek dakarren guztiaren berri izan gabe. Arrazoi horregatik, lan honen helburua erronka horri heltzea izango da, energia berriztagarrien instalazio deszentralizatu hibridoen bideragarritasun teknikoa eta ekonomikoa aztertuz hain zuzen ere. Zehazki, azterketa honetan energia eolikoa, fotovoltaikoa eta energia biltegiratzeko sistemak konbinatzea aukeratu da soluzio gisa. Modu honetan, energia-iturri bakoitzaren indarguneak aprobetxa daitezke klima-aldaketen aurrean produkzio konstanteago bat lortzeko asmotan. Proposamen hau ebaluatzeko, Bizkaiko hegoaldean kokatzen den Arratiako bailara izango da aztergai, herriz herriko analisi bat eginez, zortzi udalerrien izaera ezberdina kontuan izanik; kontsumo-ohiturak, azalera erabilgarria, produkzio mugak…autosufizientzia energetikoa lortzeko xedearekin kasu bakoitzerako beharrezko aukerak erakutsiko dira. Laburbilduz, aipatutako azterketa ahalbidetuko duen metodologia bat aurkeztuko da, Arratiako bailara izanik analisiaren abiapuntu. Autokontsumo lokala oinarri, energia- sektorearen egungo erronkei erantzungo diena, trantsizio energetiko kontzienteagoa lortzeko.