Osasun Hezkuntza Programa. Alkoholaren kontsumoaren prebentzioa 13-14 urteko nerabeetan

Abstract

Sarrera: alkoholaren kontsumoaren hasiera 14 urte inguruan ematen da Espainia-mailan. Azken urteotan, Gobernutik hainbat neurri hartu dira, baina ez dira nahikoa izan zenbaki horiek hobetzeko. Arazoaren tamaina, kausak eta ondorioak ikusiz eta nerabeen ezaugarriak kontutan hartuta, alkoholaren kontsumoa arriskuzko jarduera kontsideratu daiteke. Nerabeek hainbat hesi dituzte gai honen inguruan laguntza-profesionala jasotzeko. GrAL honen bidez, nerabeek alkoholaren kontsumoarekin izan ditzateketen arazo horiek prebenitzeko, Osasun Hezkuntza Programa sortu da, erizaintzaren ikuspuntutik.

Helburua: Legazpiko Haztegi Ikastolako 13-14 urteko DBH2-ko ikasleen alkoholaren kontsumoa prebenitzeko Osasun Hezkuntza Programa sortzea da helburu orokorra.

Metodologia: Osasun-Hezkuntza Programa hau gauzatzeko, gaiaren inguruko informazioaren bilaketa bibliografikoa burutu da. Lortutako informazioa ebidentzia zientifikoan oinarrituta egoteko helburuarekin, datu-base elektronikoak (Pubmed, Dialnet eta Scielo), erakunde desberdinen web-orriak, aldizkari elektronikoak eta osasun-hezkuntza programak diseinatzeko eskuliburuak erabili dira. Horretaz gain, talde-dianaren kaptaziorako bi gutun idatzi dira: Ikastolako zuzendariari eta ikasleen gurasoei.

Planifikazioa: helburu orokorra ikasleak alkoholaren kontsumoaren inguruan formatzea izanik, sei saioetan banatuko den Programa proposatu da. Plangintza hainbat blokeetan banatua dago: helburu pedagogikoak, ekintzen programazioa (edukiak, metodologia pedagogikoa eta errekurtsoak jorratuz) eta ebaluazioaren programazioa (egitura, prozesua eta emaitzak aztertuz).

Ekarpen pertsonala: Programa honi esker, 13-14 urteko nerabeek alkoholari aurre egiteko estrategiak ezagutuko dituzte eta dituzten baliabideak kontuan hartuz horiek praktikan nola jarri irakatsiko zaie, bizimodu osasuntsuagoa izan dezaten. Erizain zein gizartearentzat oso baliagarria izan daiteke horrelako Programak eskuragarri edukitzea, osasun-profesionalek heziketa era antolatuan eman ahal izateko eta gizarteak bizi-ohitura osasuntsuak ezagutzeko tresnak eskuratzeko.