Ospitale eremuan zainketa aringarriak eskaintzen dituzten erizainen komunikazio gaitasunak trebatzeko osasun hezkuntza programa

Abstract

Sarrera: Zainketa aringarriak jasotzeko irizpidea duen pertsona orok ez du aukera izaten unitate espezifikoetan artatua izateko. Izan ere, gero eta ohikoago da zainketa aringarriak ospitale eremuan eman behar izatea. Horregatik, zainketa aringarriak jasotzen dituzten pazienteekin lan egiten duten osasun profesional asko galduta sentitzen dira eta ez dute jakiten nola komunikatu egin beharreko zainketa edo jaso beharreko tratamendua, pazientearengan izango duen eraginaren beldur. Honela, pazientearen behar zein nahiak alde batera uzten dira, estresa, antsietatea eta konfiantza eza lortuz. Hori dela eta, erizainek komunikazio trebetasunak lortzeko osasun hezkuntza (OHEZ) programa bat egitea proposatzen da.

Helburua: Ospitale eremuko erizainek zainketa aringarriak jasotzen dituzten pazienteen aurrean komunikazio gaitasunak trebatzeko osasun hezkuntza programa baten diseinua garatzea.

Metodologia: Programa garatzeko, bilaketa bibliografikoa egin da hainbat datu-baseetan Descriptores en Ciencias de la Salud (DeCs), Medical Subject Headings (MeSH) eta hitz-gako ezberdinak erabiliz. Horrez gain, zenbait gida, liburu eta web-guneetatik lortu da informazioa.

Plangintza: Xede taldeak zainketa aringarriak jasotzen dituzten pazienteen aurrean komunikazio ezagutzak, jarrerak eta gaitasunak lortzeko helburu pedagogikoak ezarri dira, saio bakoitzean teknika ezberdinez osatutako hezkuntza jarduerak prestatuz. Aipatutako helburuak lortzeko, guztira lau saio proposatu dira. Horrez gain, programa aurrera eramateko baliabideak aztertu eta ebaluazio tresnak garatu dira.

Ekarpen pertsonala: Osasun hezkuntza programa honen lehen atalean zein izandako esperientzian ikusi da, tarteka zainketa aringarriak jasotzeko irizpidea duten pazienteak beste unitate ezberdinetara bideratzen direla, hauetan zainketa aringarriekiko formakuntza falta eta gabeziak sumatuz. Hori dela eta, batzuetan arlo humanizatua alde batera utzi eta teknikei garrantzia ematen zaie, bertan egoteaz ahaztuz. Beraz, gaur egungo beharrari aurre egiteko erizaintzako eredu bat erabili da, komunikatzeko trebetasunak garatu eta bizitzako azken etapa kalitatezko amaiera batean bilakatzeko.