Gizarte Langintza eta Gizarte Hezkuntza: nahasmenetik uztargarritasunera

Abstract

Ezagutu ditugun kultura sistema guztietan ezberdintasun sozialak egon dira: txiroak eta aberatsak, gaixoak eta pertsona osasuntsuak, babesgabeak eta babestuak. Hala ere, gizakiaren historia osoan zehar beharrizan egoerei erantzuteko modu antolatuan jardutea funtsezkoa izan da, eta gizarte ekintza forma ezberdinak asmatu ditu gizakiak ondokoa laguntzeko helburuarekin. Hauek ez dira era berean gertatu garai guztietan, uneko testuinguru sozial, politiko eta ekonomikoagatik erabat baldintzatuak egon baitira. Laguntza forma ezberdinen bilakaera historikoaren emaitza dira Gizarte Langintza zein Gizarte Hezkuntza. Bi diziplinen arteko lotura estuak partekatzen dituzten ezaugarrietan gehiegizko arreta jartzera eraman du sarritan, eta ondorioz, nahasmen egoera nagusitu da. Horri gehitu behar zaio, sarritan, gizarte zerbitzuetan gizarte langileek gizarte hezitzaileen lana egiten dutela, eta alderantziz, eta figura profesionalen arteko trukaketak horrek egoera are gehiago nahasten duela. Gizarte Langintza eta Gizarte Hezkuntzaren arteko erlazio korapilatsu horrek, eta tartean antzeman daitezkeen liskar profesional, gaizkiulertu eta lehiakortasun giroak, ondorio negatiboak ditu profesionalen arteko harremanean zein gizarte esku-hartzetako erabiltzaileen garapenean. Hori dela eta, nahasmen egoera elikatzen duten elementuak bilatzea, bi diziplina bereizi direla ezartzea, eta bien arteko uztargarritasuna frogatzean oinarrituko da ondorengo lana. Horretarako, lehenik, bi diziplinen aurrekariak, hastapenak eta garapena ikertuz Gizarte Langintza eta Gizarte Hezkuntzaren bilakaera historikoa aztertuko da. Bigarrenik, lana burutzeko metodologia aurkeztuko da, bereziki buruturiko azterketa bibliografikoan sakonduko dena. Hirugarrenik, azalduriko gaien analisia egingo da, ikerketaren hipotesia baieztatu eta helburuak lortzera bideraturik egongo dena. Azkenik, lanarekin amaitzeko, ikerketaren ondorio nagusiak eta gogoeta pertsonala uztartuko dituen azken atala garatuko da.