Gizarte gaitasunen trebakuntzan ikasleriak parte hartzea sustatzearen erronka

Abstract

Komunikazio eta Gizarte Gaitasunak eta Ikerkuntza-erremintak Ingeniaritzan irakasgaia Gasteizko Ingeniaritza Eskolako Automobilgintzaren Ingeniaritzako Graduan irakasten da, Euskal Herriko Unibertsitatean (UPV/EHU). Adarreko oinarrizko irakasgaia izanik, Graduko arlo espezifikoarekiko guztiz zeharkakoak diren gaiak jorratzen ditu. Honela, irakaskuntza-taldearen erronka handia da ikaslea motibatua sentitzea irakasgaiaren jardunean; eta noski, hau lortzeko modu bakarra dinamika bidezko irakaskuntza gauzatzea izango da, ikasleen parte-hartze aktiboa ahalbidetzen duena eta bide batez bere formakuntzaren protagonista nagusi bihurtzen duena. Irakaskuntza aktiboko metodologiak erabiliz, ikasleak adimen emozionala, enpatia, asertibitatea eta aditze aktiboa eta gisako erreminten inguruko entrenamendua egiten du irakasgaiko irakaskuntza -emaitzak lortu ahal izateko. Trebatze-prozesu honek ikasleekin etengabeko elkarrekintza dakar, eta baita taldearen kohesioaren areagotzea ere. Logikoki, parte-hartzea da irakaskuntza mota honen ardatza. Honela, autoezagutza eta garapen pertsonalarekin, talde-lanarekin eta lidergoarekin eta, noski, komunikazioarekin zerikusia duten dinamikak gauzatzen dira. Azken honen harian, adibidez, feedback-mezua osatu, eman eta jasotzeko prozesuaren entrenamendu intentsiboa egiten da. Bi urteko ibilbide honetan egiaztatu ahal izan dugunez, nahiz eta hasieran ikasleek irakasgaiak eskainiko dienaren baliagarritasunaren itxaropen handiegirik ez duten, behin ikastaroa amaitzen dutenean, barneratu duten guztiaz harrituta sentitzen dira eta beren etorkizunerako oso onuragarriak izango dituzten gaitasunak landu direlako sentsazioa dute, bai bizitza akademikorako, profesionalerako, eta baita pertsonalerako ere.