Mendebaleko euskara zaharra: ezaugarriak, kronologia eta geografia

Abstract

Liburu honek "Mendebaleko Euskara Zahar" deitu izan den egoera linguistikoa edo makrodialektoa du aztergai; hots, X. mendeaz geroztik Euskal Herriko mendebal zabalean (Bizkaian, Araban, Gipuzkoan eta Nafarroako mendebaleko zenbait ibarretan) ageri den eremu linguistiko zabala. Gerora, zenbait azpizatiketa gertatu ondoren, handik sortuak dira lurralde horietan ezagutu ditugun euskalki modernoak.

Lanaren helburua Euskal Herriko mendebal zabaleko X.-XV. mendeen arteko zatiketa kronologikoak eta dinamika geolinguistikoak berreraikitzea da. Hain zuzen, Erdi Aroko datu onomastikoak eta XV. mendeaz geroztiko testuetakoak nazioarteko irizpide metodologiko estandarrez aztertuta, ondorioak aurkezten dira Erdi Aroko azken bost mendeetako ezaugarri dialektalen izaeraz, ondoz ondoko geruza kronologikoez, ezaugarrien hedaduraz eta Mendebaleko Euskara Zaharraren lehenengo azpizatiketez.